Mámleketimiz basshısı Shavkat Mirziyoyevtiń bilimlendiriw sistemasına qaratıp atırǵan itibarınıń nátiyjesinde 2023-2024-oqıw jılı ushın barlıq baǵdarlar boyınsha tólemli kontrakt muǵdarları arttırılmaytuǵın boldı.

Studentler hám olardıń ata-analarına jeńillik jaratıw jáne olardı qollap-quwatlaw, sonday-aq, xalıqtıń tólew jaǵdayın esapqa ala otırıp, burınǵısınan ózgeshe tárizde, 2023-2024-oqıw jılı ushın barlıq basqıshtaǵı studentlerdiń tólemli kontrakt tiykarında oqıtıw summasınıń muǵdarı mámleketlik joqarı oqıw orınları, sonıń ishinde, finanslıq erkinlik berilgen joqarı oqıw orınlarında da bazalıq tólemli kontrakt summası 2022-2023-oqıw jılı ushın belgilengen muǵdarlarda saqlap qalınadı.

Sonıń menen birge, 2023-2024-oqıw jılınıń eselengen tólemli kontrakt («super kontrakt») muǵdarları ótken oqıw jılı ushın belgilengen muǵdarlarda ózgerissiz qaladı.

2023-2024-oqıw jılı qabıllawında toplaǵan balları tastıyıqlanǵan qabıllaw parametrleri shegarasına jetpegen, biraq eselengen tólemli kontrakt tiykarında oqıw niyetin bildirgen abiturientlerge, burınǵısınan ózgeshe tárizde, jańa oqıw jılı baslanıwınan shártnamalardı rásmiylestiriwge, sonday-aq, bir jıllıq oqıtıw summasınıń 50 procentin tólegenlerdi studentler qatarına qabıl etiwge ruxsat berildi.

Sonday-aq, jáne bir jeńillik – tastıyıqlanǵan eselengen tólemli kontrakt summasın 2023-jıl 15-oktyabrge shekem tolıq tólegen abiturientler ushın 10 procent muǵdarında shegirme berilmekte.

NMPI baspasóz xızmeti.