Búgingi kúnde mámleketimizde ámelge asırılıp atırǵan keń kólemli reformalardıń mazmunı hám áhmiyetin xalqımızǵa jetkerip beriwde ǵalaba xabar quralları, sonıń ishinde, baspasózdiń ornı ayrıqsha.

Informaciyanıń globallasıwı sharayatında sociallıq tarmaqlardıń ornı joqarı basqıshqa kóterilip, hár qanday maǵlıwmat operativ túrde Internet arqalı jetkerilip berilip atırǵan házirgidey dáwirde baspasóz, yaǵnıy gazeta-jurnallarǵa bolǵan itibar tómenlep ketkenligi ashshı haqıyqat.

Ájiniyaz atındaǵı Nókis mámleketlik pedagogikalıq institutında ótkerilgen ushırasıwda usı máseleler haqqında sóz etildi.

Ilajda «Ámiwdárya» jurnalı, «Erkin Qaraqalpaqstan», «Vesti Karakalpakstana», «Qoraqalpoǵiston tongi», «Qaraqalpaqstan jasları», «Jetkinshek» sıyaqlı respublikalıq gazetalardıń wákilleri, belgili jurnalistler xalqımız arasında gazeta-jurnallardı oqıw jaǵdayınıń tómenlep ketkenligi, bunıń aqıbetleri haqqında aytıp ótti.

Jasıratuǵını joq, bunnan eki-úsh jıllar ilgeride «Gazeta-jurnallar bizge kerek pe?» degen mazmundaǵı sorawlar da kún temasına shıǵıp, hátteki, ayırım mámleketlik basqarıw uyımlarınıń basshıları da «Informaciyalıq texnologiyalar zamanında gazeta da, jurnal da kerek emes» degen pikirlerdi bildirgeni ele heshkimniń esinen shıqpaǵan bolsa kerek.

Bul máselege mámleketimiz basshısı, húrmetli Prezidentimiz Shavkat Mirziyoyev dıqqat qaratıp, «Sonday ayanıshlı jaǵdayǵa kelip qaldıq, hátteki, ayırım basshılar gazeta oqımaytuǵınlıǵı menen maqtanatuǵın boldı. Meniń kompyuterimde hámme nárse bar, meniń telefonımda hámmesi bar dep. Bul bolmaydı, gazetanı da, jurnaldı da oqıp turıw kerek, bul zamannıń talabı. Ózińiz bilesiz, dúnyada kompyuter texnologiyaları eń rawajlanǵan mámleket – bul Yaponiya. Biraq, usı mámlekette kúnine úsh tórt million nusqada basıp shıǵarılatuǵın gazetalar bar ekenligine ne deysiz? Gazeta hám jurnallar hámmemizge kerek», dep aytıp ótken edi.

Ózbekstanda 2018-jılı sociallıq taraw xızmetkerleri, shıpakerler hám muǵallimlerdiń gazeta-jurnallarǵa májbúriy jazılıwına tıyım salınǵan edi.

Bunıń nátiyjesinde májbúriy jazılıwdı sebep etip ulıwma gazeta-jurnallarǵa itibar berilmey qaldı.

Xalqımızdıń ruwxıy-aǵartıwshılıq turmısında gazeta-jurnallardıń ornı ayrıqsha ekenligin hesh kim biykarlay almaydı.

Usı maqsetlerden kelip shıǵıp tiyisli juwapkerler jıynalǵanlardı gazeta hám jurnallarǵa turaqlı jazılıwǵa, óz maqalaları, dóretiwshilik jumısları menen baspasóz betlerinde turaqlı qatnasıwǵa shaqırdı.

Ilajda ustaz dóretiwshiler hám qábiletli studentler ózleriniń qáleminen dórelgen qosıqlardı oqıp berdi.

NMPI baspasóz xızmeti.