Xabarıńız bar, 2024-2025-oqıw jılı qabıllawında Ájiniyaz atındaǵı Nókis mámleketlik pedagogikalıq institutında kásiplik (dóretiwshilik) imtixanı bolǵan bakalavriat tálim baǵdarlarına dizimnen ótken abiturientler ushın imtixanlar 2024-jıldıń 9-13-iyul kúnleri ótkeriliwi belgilengen edi.

Búgin, 8-iyul kúni institut rektorı wazıypasın waqıtsha atqarıwshısı Quvondiq Qodirov kásiplik (dóretiwshilik) imtixanlardı ótkeriw ushın biriktirilgen Ózbekstan-Finlyandiya pedagogikalıq institutı, Jizzaq mámleketlik pedagogikalıq universiteti, Termiz hám Buxara mámleketlik pedagogikalıq institutlarınıń professor-oqıtıwshıları, sonday-aq, qabıllaw komissiyasınıń tiyisli juwapkerleri menen sáwbetlesti.

Sáwbetlesiw barısında institutta bakalavriattıń dene mádeniyatı, muzıkalıq tálim, súwretlew óneri hám injenerlik grafikası tálim baǵdarlarına qabıllaw ushın ótkeriletuǵın kásiplik (dóretiwshilik) imtixanlarǵa tayarlıq barısı, jaratılǵan sharayatlar haqqında maǵlıwmatlar berdi.

Sonday-aq, imtixanlar barısın ádil, ashıq-aydın, nızam talapları tiykarında, korrupciyalıq jaǵdaylarsız ótkeriw boyınsha tiyisli kórsetpeler hám usınısların bildirdi.

Esletip ótemiz, kásiplik (dóretiwshilik) imtixannıń anıq sánesi, waqtı hám mánzili hár bir abiturienttiń my.uzbmb.uz saytındaǵı jeke kabinetine jiberildi.

Abiturientlerden:

– ózleriniń jeke kabinetleri arqalı kásiplik (dóretiwshilik) imtixanlarda qatnasıw ruxsatnamasın júklep alıwı;
– ruxsatnamada belgilengen múddet hám mánzilge imtixan baslanıwınan bir saat aldın jetip keliwi soraladı.

NMPI baspasóz xızmeti.