Búgin, 6-yanvar kúninen baslap Ájiniyaz atındaǵı Nókis mámleketlik pedagogikalıq institutında barlıq fakultetler hám kafedralar kesiminde tálim-tárbiyanıń sapasın arttırıw hám 2025-jılda ámelge asırılatuǵın ilimiy-pedagogikalıq jumıslardıń prezentaciyaları ótkerilmekte.

Prezentaciya ilajlarında institut rektorı Quvondiq Qodirov hám barlıq prorektorlar, sonıń menen birge, bilimlendiriw sapasın qadaǵalaw bólimi wákilleri qatnasıp, dáslep kafedralardıń baslıqları, sońınan fakultetlerdiń dekanlarınıń kún tártibindegi máseleler boyınsha pikir-usınısların tıńladı.

Kúnniń dáslepki yarımında Shet tilleri, sonıń menen birge, Súwretlew óneri hám texnologiyalıq tálim fakultetlerinde bolıp ótken prezentaciyalarda ótken 2024-jıl dawamında oqıw-tárbiyalıq hám ilimiy-pedagogikalıq baǵdarda islengen jumıslardıń nátiyjeleri menen birge 2025-jıldıń jol kartasında belgilengen wazıypalar keń túrde dodalandı.

Ásirese, bilimlendiriwdiń sapası, professor-oqıtıwshılardıń ilimiy dárejeliligi, shet tillerin ózlestiriw kórsetkishlerin jańa basqıshqa kóteriw, baspaǵa usınılıp atırǵan tezis, maqala, oqıwlıq qollanba, sabaqlıq hám monografiyalardıń sapası hám zaman talapların sáykesliligin arttırıw, studentlerdiń sabaqlarǵa qatnası jáne «4+2» formatındaǵı ámeliyat barısın turaqlı túrde qadaǵalaw, aldaǵı juwmaqlawshı imtixanlar barısında korrupciyalıq jaǵdaylardıń aldın alıw hám usı sıyaqlı oqıw procesiniń áhmiyetli máseleleri fakultetler hám kafedralar jámáátleri menen birgelikte talıqlandı.

Ótkerilgen ilajlar barısında professor-oqıtıwshılar hám tiyisli juwapkerler sózge shıǵıp, kún tártibindegi máseleler boyınsha institut rektorı hám prorektorlarǵa óz usınısların bildirdi.

Prezentaciyalar juwmaǵında kórip shıǵılǵan máseleler boyınsha tiyisli wazıypalar belgilep alındı hám juwapkerlerge tapsırmalar berildi.

NMPI baspasóz xızmeti.