Ájiniyaz atındaǵı Nókis mámleketlik pedagogikalıq institutı Shet tilleri fakulteti rus tili hám ádebiyatı kafedrası tárepinen slavyan xalıqlarınıń áyyemgi hám dástúriy bayramlarınıń biri esaplanǵan «Maslenica» bayramı shólkemlestirildi.

Bayram keshesinde fakultet dekanınıń orınbasarı M.Allaniyazova, kafedra baslıǵı A.Xojaniyazova hám basqalar sózge shıǵıp, qatnasıwshılardı elimizge kirip kelgen jańalanıw hám jasarıw áyyamı – báhár bayramı, sonıń menen birge, usı máwsimniń dárekshisi esaplanǵan «Maslenica» bayramı menen qutlıqladı.

Bul bayram hár jılı institutta xalıqlar doslıǵı, milletler aralıq tatıwlıq hám awızbirshilik bayramı sıpatında joqarı shólkemleskenlik penen belgilenedi.

Keshesinde studentler báhárgi quyash hám bayramnıń belgisi esaplanǵan blinlerdi tarqatıp, qatnasıwshılar menen hár qıylı oyın-zawıqlardı ótkerdi.

Sonıń menen birge, qábiletli jaslar «Maslenica» bayramınıń mazmunın ańlatatuǵın hápte kúnleri boyınsha saxnalıq kórinislerdi jıynalǵanlardıń názerine usındı.

Ilaj juwmaǵında barlıq qatnasıwshı studentler xoshametlendi.

NMPI baspasóz xızmeti.