Usı jıldıń 11-13-iyun kúnleri aralıǵında Úrgenish mámleketlik pedagogikalıq institutında Ózbekstan Respublikasındaǵı barlıq joqarı oqıw orınları studentleri arasında ótkerilip atırǵan «Debat» intellektual turniriniń respublikalıq basqıshı bolıp ótpekte.

Joqarı bilimlendiriw, ilim hám innovaciyalar ministrligi, Jaslar isleri agentligi hám Ózbekstan jaslar awqamı tárepinen shólkemlestirilgen turnirdiń juwmaqlawshı basqıshında respublikamızdıń hár qıylı aymaqlarınan ulıwma 18 komanda logikalıq pikirlew, sóylew mádeniyatı hám áhmiyetli jámiyetlik mashqalalar boyınsha óz ara debat alıp baradı.

Áhmiyetlisi, bul basqıshta Qaraqalpaqstan Respublikasınan Ájiniyaz atındaǵı Nókis mámleketlik pedagogikalıq institutınıń «Sahra búlbilleri» komandası da qatnaspaqta.

Komandamız quramı Baslawısh tálim fakultetiniń 4-kurs studentleri Durdona Tolıbaeva hám Sevara Yusupova, sonıń menen birge, Tariyx fakultetiniń 2-kurs studenti Jasurbek Nurullaevlardan ibarat.

Házirgi waqıtta institutımız komandası saylap alıw basqıshınan ótip, topar basqıshına jollama aldı.

Institutımız jaslarına turnirde áwmet tileymiz!

NMPI baspasóz xızmeti.