Xabarıńız bar, Ájiniyaz atındaǵı Nókis mámleketlik pedagogikalıq institutında tálim-tárbiya procesiniń nátiyjeliligin arttırıw maqsetinde fakultetler kesiminde «Ashıq esikler kúni» ilajları hám ata-analar menen ushırasıwlar ótkerilmekte.

Mektepke shekemgi hám baslawısh tálim fakultetinde ótkerilgen ushırasıwda ata-analarǵa institutta jaratılǵan sharayatlar, studentlerdiń oqıw procesi, ilimiy hám dóretiwshilik jumısları, olardıń jámiyetlik jumıslardaǵı qatnası haqqında tolıq maǵlıwmat berildi.

Ashıq sáwbet tárizinde ótken ushırasıw dawamında studentlerdi turaq jay menen támiyinlew, ijara úylerinde jasaytuǵın jaslar arasında gúz-qıs máwsimine tayarlıq boyınsha ámelge asırılıp atırǵan jumıslardıń barısı, ásirese, jılıtıw máwsiminde záhárli gazden zıyanlanıwınıń aldın alıw baǵdarındaǵı úgit-násiyat jumısları, studentler arasında jınayatshılıq hám huqıqbuzarlıqlar profilaktikası, internet hám sociallıq tarmaqlardan orınlı paydalanıw máseleleri dodalandı.

«Ashıq esikler kúni» sheńberindegi bunday ushırasıwlar ata-analar, studentler hám institut arasındaǵı birge islesiwdi ele de bekkemlew hám tálim-tárbiya procesiniń nátiyjeliligin arttırıwǵa xızmet etedi.

NMPI baspasóz xızmeti.