Ájiniyaz atındaǵı Nókis mámleketlik pedagogikalıq institutında 1-dekabr – Qaraqalpaq tili bayramı kúni hám qaraqalpaq tiline mámleketlik til biyligi berilgenine 36 jıl tolıwına arnalǵan bayram keshesi bolıp ótti.

Ilajǵa Ózbekstan Ilimler akademiyası Qaraqalpaqstan bólimi Qaraqalpaq gumanitar ilimler ilimiy-izertlew institutı professorı Perdebay Najimov, professorlar Qutlımurat Qoshanov, Gulmurza Qurbaniyazov, Alima Pirniyazova, Qaraqalpaqstan xalıq shayırı Gúlistan Dáwletova, sonday-aq, joqarı oqıw orınlarınan ilimpazlar, institut professor-oqıtıwshıları, pedagog xızmetkerleri, jas izleniwshiler hám studentler qatnastı.

Bayram keshesin instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ilajda qaraqalpaq tiline mámleketlik til biyliginiń beriliw tariyxı, túrkiy tiller sistemasında qaraqalpaq tiliniń mámleketlik til sıpatındaǵı ornı hám búgingi kúnde ushırasıp atırǵan mashqalalar, olardı sheshiw ushın aldaǵı wazıypalar, qaraqalpaq tili rawajlanıwınıń huqıqıy tiykarları, internet tarmaqlarında qaraqalpaq tilin rawajlandırıw máseleleri boyınsha bayanatlar jasaldı.

Bayanatlarda sóz etilgenindey, házirgi waqıtta dúnyada altı mıńnan aslam tiller bolǵanı menen, olardıń tek 170 ten aslamı óziniń mámleketlik til statusına iye. Olar arasında qaraqalpaq tiliniń de bar ekenligi úlken quwanısh hám maqtanısh bolıp tabıladı.

Qaraqalpaq tiline mámleketlik til biyliginiń beriliwi xalqımızdıń ózligin ańlawı, ǵárezsiz turmısta ómir súriwi hám ata-babalardan miyras bolıp kiyatırǵan milliy miyraslarımız, qádiriyatlarımızdı qásterlep-saqlap, keleshek áwladlarǵa jetkerip beriwdey ullı iste taslanǵan áhmiyetli, tariyxıy qádem boldı.

Ǵárezsizlik jıllarında qaraqalpaq tiliniń milliy ózgesheliklerin saqlap qalǵan halda rawajlandırıw, ilimiy-izertlew jumısların jańa basqıshqa kóteriw, dúnya tilleri qatarındaǵı abıroy-mártebesin arttırıw, keleshek áwladlarǵa jetkerip beriwdey jumıslarda sezilerli nátiyjelerge erisildi. Solardıń biri sıpatında, Qaraqalpaqstan Respublikası Joqarǵı Keńesi hám Ministrler Keńesiniń qollap-quwatlawı menen «Qaraqalpaq tiliniń túsindirme sózliginiń VII tomlıǵı» baspadan shıǵarılǵanlıǵın atap ótiw orınlı.

Ilaj sheńberinde institutta bayram múnásibeti menen birqatar mádeniy-aǵartıwshılıq ilajların shólkemlestiriwge belsene qatnasqan professor-oqıtıwshılar hám student-jaslarǵa húrmet jarlıqları jáne bayram sawǵaları tapsırıldı.

Bayram keshesi instituttıń «Tumaris» xalıq ansambli aǵzaları, sonday-aq, Filologiya fakultetiniń qábiletli studentleri atqarıwındaǵı koncert baǵdarlaması menen dawam etti.

NMPI baspasóz xızmeti.