Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde 1-dekabr – Dúnya júzilik AIJSke qarsı gúresiw kúni múnásibeti menen studentler arasında salamat turmıs tárizin úgit-násiyatlawǵa baǵdarlanǵan ushırasıw shólkemlestirildi.

Ushırasıwǵa Respublikalıq AIJSke qarsı gúresiw orayınıń shıpakeri A.Jánibekova, Salamatlıq hám strategiyalıq rawajlanıw institutı Nókis qalalıq bólimi shıpakeri T.Ganieva hám Respublikalıq qánigelestirilgen narkologiya ilimiy-ámeliy orayınıń shıpakeri P.Seytekov, fakultet dekanatı wákilleri, tyutorlar hám studentler qatnastı.

Ushırasıw dawamında qánigeler AIV/AIJS infekciyasınıń aldın alıw, onıń juǵıw jolları, erte diagnozlawdıń áhmiyeti, zárúr profilaktikalıq ilajlarǵa baylanıslı tolıq maǵlıwmatlar berdi.

Ilaj qatnasıwshıları menen ashıq pikirlesiw tárizinde sáwbetler ótkerilip, olardıń sorawlarına juwaplar berildi. Sonday-aq, studentler ushın úgit-násiyat materialları tarqatıldı.

Ushırasıw sońında salamat turmıs tárizine ámel etiw, medicinalıq tekseriwden turaqlı ótip turıw hám jeke juwapkershilikti arttırıw boyınsha usınıslar berildi.