Elimizde jaslarǵa baylanıslı mámleketlik siyasat jańa basqıshqa kóterilmekte. Mámleketimiz basshısınıń jaqında Kóksaray rezidenciyasında jaslar menen bolıp ótken ushırasıwı hám sóylesiwinde olardıń baslamaların qollap-quwatlaw, bántligin támiyinlew, startap hám innovaciyalıq joybarlardı rawajlandırıw boyınsha belgilep berilgen baslı wazıypalar bul baǵdardaǵı jumıslardı bunnan bılay da sistemalı hám nátiyjeli shólkemlestiriwge xızmet etedi.

Prezidentimiz tárepinen alǵa qoyılǵan baslamalar, eń aldı menen, hár bir jastıń zamanagóy bilim hám kásip-óner iyelewi, shet tillerin jetik úyreniwi, sanlı kónlikpelerge iye bolıwı hám miynet bazarında múnásip orın tabıwın támiyinlewge baǵdarlanǵanı menen áhmiyetli esaplanadı. Óytkeni, búgingi globallasıw sharayatında básekige shıdamlı kadrlar tayarlaw hám qashanǵıdan da áhmiyetli máselege aylandı.

Búgingi kúnde Ájiniyaz atındaǵı Nókis mámleketlik pedagogikalıq institutında 13 mıńnan aslam student-jaslar bilim almaqta. Institutta studentlerdiń zamanagóy bilim hám kónlikpelerge iye bolıwın támiyinlew maqsetinde shet tilleri, málimleme texnologiyaları, sonday-aq, sanlı sawatlılıq baǵdarlarında qosımsha oqıw kursları shólkemlestirilgen. Bul kurslar arqalı jaslardıń miynet bazarında básekige shıdamlılıǵın arttırıw, olardı zamanagóy kásiplerge baǵdarlaw maqset etip belgilengen.

Ushırasıwda mámleketimiz basshısı tárepinen atap ótilgenindey, jaslar isbilermenligin qollap-quwatlaw, olar ushın qarjı resursları hám jeńillikli kreditler kólemin keńeytiw, startap joybarlarǵa investiciyalardı tartıw boyınsha belgilengen wazıypalar jaslardıń ekonomikalıq belsendiligin arttırıwǵa xızmet etedi. Bul bolsa, óz gezeginde, jańa jumıs orınların jaratıw, innovaciyalıq ideyalardı turmısqa engiziw hám elimiz ekonomikasın bekkemlewdiń tiykarǵı faktorı bolıp tabıladı.

Institutta pitkeriwshi kurs studentleriniń bántligin támiyinlew hám isbilermenlik baslamaların qollap-quwatlaw, sonday-aq, olardı turmısqa engiziw maqsetinde «Keleshekke qádem» orayınıń jumısı jolǵa qoyıldı. Bul orayda tiyisli banklerdiń juwaplı xızmetkerleri, sonday-aq, belgili isbilermenler qatnasıwında «Biznes ideyadan tayar joybarǵa shekem» atamasında seminar-treningler ótkerip kelinbekte. Sonıń nátiyjesinde, házirgi waqıtqa shekem instituttıń 69 studentine ulıwma 2 milliard 220 million sumǵa shamalas muǵdardaǵı kredit qarjıları ajıratıldı hám olar ózleriniń isbilermenlik jumısların baslap jiberdi.

Jaslar menen ushırasıwda mámleketimiz basshısı tárepinen belgilengen wazıypalardı institut kóleminde nátiyjeli ámelge asırıw maqsetinde:

1) Studentler ushın shet tilleri, IT hám zamanagóy kásipler boyınsha biypul yamasa jeńilletilgen kurslar shólkemlestiriw;
2) Jaslardıń innovaciyalıq joybarların saylap alıw, mentorlıq sistemasın engiziw hám investorlar menen baylanıstırıw;
3) Biznes joba dúziw, grant hám kredit alıw mexanizmleri boyınsha «Keleshekke qádem» orayı jumıslarınıń nátiyjeliligin arttırıw;
4) Volontyorlıq, ekologiya hám ruwxıy-aǵartıwshılıq baǵdardaǵı baslamalardı, sociallıq joybarlardı qollap-quwatlaw;
5) Ilim hám innovaciyalardı integraciyalaw – studentlerdiń ilimiy islenbelerin óndiris penen baylanıstırıw, ámeliyat bazaların keńeytiw baǵdarında aldımızǵa joqarı maqsetlerdi belgilep aldıq.

Ayrıqsha atap ótiw orınlı, jaslar ushın jaratılıp atırǵan keń imkaniyatlar olardıń intakerligi hám batıllıǵı menen úylesken jaǵdayda ǵana joqarı nátiyjeler beredi. Hár bir student óz aldına anıq maqset qoyıp, bilim hám tájiriybesin arttırıwǵa umtılsa, elimizdiń rawajlanıwına múnásip úles qosadı.

Búgin biz, joqarı bilimlendiriw tarawı juwapkerleri hám professor-oqıtıwshılar, Prezidentimiz tárepinen belgilengen wazıypalardı ámelge asırıwǵa belsene qatnasıw, jaslardıń hár bir ideyasın qollap-quwatlaw hám olardıń jetik kadrlar bolıwı ushın zárúr sharayat jaratıwdı ózimizdiń tiykarǵı wazıypamız dep esaplaymız.

Óytkeni, Jańa Ózbekstannıń erteńgi kúni – bilimli, intaker hám watanǵa muhabbatı joqarı bolǵan jaslar qolında.

Alisher Ubbiyev,
Ájiniyaz atındaǵı Nókis mámleketlik pedagogikalıq institutınıń rektorı.