Búgingi kúnde elimizde bir júz otızdan aslam millet hám xalıqlardıń wákilleri bir shańaraqtıń perzentlerindey tatıwlıqta, awızbirshilikte jasap, túrli tarawlarda nátiyjeli miynet etpekte. Barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵan. Mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılmaqta.

Milletler arasındaǵı doslıqtı jırlaw, olardı jaslarımız arasında keńnen úgit-násiyatlaw maqsetinde Ájiniyaz atındaǵı Nókis mámleketlik pedagogikalıq institutında «Ózbekstan – ulıwma úyimiz» atamasındaǵı festivaldı hár ayda ótkeriw jaqsı dástúrge aylanǵan.

15-mart kúni ótkerilgen usınday festival sheńberinde mámleketimizde jumıs alıp barıp atırǵan milliy-mádeniy oraylar, sonday-aq, institutta oqıp, bilim alıp atırǵan túrli millet wákilleri, sheber studentler tárepinen islengen milliy kiyimler, qol óneri úlgileri, súwretler kórgizbeleri shólkemlestirildi.

Ilajǵa milliy-mádeniy oraylardıń basshıları, aǵartıwshı ziyalılar, ilimpazlar, professor-oqıtıwshılar hám student-jaslar qatnastı.

Házirgi waqıtta Nókis mámleketlik pedagogikalıq institutında 18 mıńǵa shamalas studentler bilim almaqta. Bilimlendiriw 5 tilde alıp barılatuǵın bul oqıw dárgayında qaraqalpaq, ózbek, qazaq, túrkmen, rus, koreys, qırǵız, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte oqıp atır. Olar tek ǵana institutta emes, sonıń menen birge, respublikamız kóleminde ótkerilip kiyatırǵan ulıwma xalıqlıq ilajlarda da tatıwlıq penen birgelikte qatnasıp, úlken nátiyjelerdi qolǵa kirgizip kelmekte.

Festival sheńberinde elimizge belgili kórkem óner sheberleri hám instituttıń «Tumaris» xalıq ansambli, Shet tilleri hám Mektepke shekemgi tálim fakultetleriniń talantlı studentleriniń atqarıwındaǵı túrli millet wákilleriniń qosıqları, ayaq-oyınlarınan ibarat koncert baǵdarlaması jıynalǵanlar itibarına usınıldı.

NMPI baspasóz xızmeti.