Búgin, 10-noyabr kúni paytaxtımız Nókis qalası aymaǵında «Jasıl mákan» ulıwma milliy akciyası sheńberindegi keń kólemli ilajlar baslandı.

Akciyada elimizdiń abadanlıǵına úles qosıwdı niyet etken jaslar, nuranıylar hám hayal-qızlar, mákeme, shólkemler xızmetkerleri qatnasıp, jaqsı niyet penen terek nállerin otırǵızdı.

Ilajǵa Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı hám elimizdiń abadanlıǵın, qorshaǵan ortalıqtıń tazalıǵın támiyinlew hám jasıl aymaqlardı payda etiwde pútkil xalqımız benen birge at salısıwımız kerek ekenligin atap ótti.

Ulıwma milliy akciyaǵa Ájiniyaz atındaǵı Nókis mámleketlik pedagogikalıq institutı jámááti hám belsendi student-jasları da qatnasıp, jaqsı niyetler menen terek nállerin otırǵızıp, qorshaǵan ortalıqtı abadanlastırıwǵa úleslerin qostı.

Atap ótiw orınlı, bıyılǵı gúz máwsiminde «Jasıl mákan» akciyası sheńberinde jámi 5 million 250 mıń dana dekorativ hám miyweli terek nálleri egiliwi belgilengen.