Búgin, 12-fevral kúni paytaxtımız Nókis qalasında azanǵı waqıtta qar jawıp, hámme jerdi appaq túske bóledi. Álbette, bul kópshiligimizdiń kewillerimizge ózgeshe quwanısh baǵıshlaǵanı sózsiz.

Qıstıń usınday jawın-shashınlı kúnlerinde de, jazdıń jáziyrama ıssısında da tınım bilmeytuǵın, bárqulla institutımızdıń, qorshaǵan ortalıqtıń tazalıǵı hám abadanlıǵı ushın xızmet etip kiyatırǵan pidayı qánige aǵa-apalarımız erte azannan baslap institut átirapında tazalaw jumısların alıp bardı.

Álbette, qıstıń suwıq kúnlerinde olarǵa harmasın aytıp, bir awız minnetdarshılıq bildiriwdiń ózi hámmemizdiń insanıylıq wazıypamız esaplanadı.

Ájiniyaz atındaǵı Nókis mámleketlik pedagogikalıq institutı Studentler keńesiniń belsendi aǵzaları usınday pidayılıq penen xızmet etip atırǵan aǵa-apalarımızǵa harmasınǵa barıp, olarǵa ıssı kofelerdi tarqattı.

Jaslarımızdıń usınday iygilikli hám úlgili jumısları kózimizdi quwantadı.

NMPI baspasóz xızmeti.