Búgin, 13-sentyabr kúni Ájiniyaz atındaǵı Nókis mámleketlik pedagogikalıq institutında Jáhán rawajlanıw banki konsultantı, venchur arxitektorı Sergey Makarov hám texnologiyalıq broker, innovaciyalıq ekosistema arxitektorı Erbolat Orazbekulı menen ushırasıw bolıp ótti.

Miymanlar dáslep institut rektorı Alisher Ubbiyev penen ushırasıp, institut professor-oqıtıwshıları, izleniwshiler hám student-jaslarınıń startap jáne innovaciyalıq ideyaların kommerciyalastırıw imkaniyatları haqqında sáwbetlesti.

Bunnan soń ekspertler izleniwshiler tárepinen islep shıǵılǵan agroósimliklerdi baqlaw joybarı menen tanıstı hám onıń ámeliy áhmiyeti, agrar tarawǵa engiziw imkaniyatları menen qızıqtı. Miymanlar joybardıń perspektivalı ekenligin atap ótip, investiciyalar hám texnologiyalıq sheriklerdi tartqan halda onı rawajlandırıw jolları boyınsha óz usınısların bildirdi.

Ilaj barısında miymanlar institut studentleriniń startap joybarları menen de tanıstı.

Ushırasıwda instituttıń ilimiy isler hám innovaciyalar boyınsha prorektorı Quwanıshbay Seytnazarov ilim menen biznes arasındaǵı tıǵız baylanıstı jolǵa qoyıw, hár qıylı baǵdarlarda startaplardı jaratıw, rawajlandırıw hám ámelge asırıwdıń áhmiyetin miymanlar menen keń túrde dodaladı. Ilajda innovaciyalıq ideyalardı qollap-quwatlaw mexanizmleri, ónimlerdi bazarǵa alıp shıǵıw jolları, joqarı oqıw orınları, biznes hám venchur strukturaları arasındaǵı birge islesiw imkaniyatları boyınsha pikir almasıldı.

NMPI baspasóz xızmeti.