«Múbárek Ramazan ayın múnásip tárizde ótkeriw haqqında»ǵı Prezident qararı (PQ-65-sanlı, 16.02.2026-j.) qabıl etildi.

2026-jılda múbárek Ramazan ayınıń baslanıwı 19-fevral kúnine tuwra keliwi haqqında Ózbekstan musılmanları basqarması tárepinen málimleme berildi.

Qararǵa bola, «Ramazan – miyrim-shápáát, awızbirshilik hám shúkirshilik ayı» degen iygilikli ideya tiykarında tómendegilerge ayrıqsha dıqqat qaratıladı:

– kem támiyinlengen, járdemge mútáj, sociallıq qorǵawǵa mútáj insanlardı hár tárepleme qollap-quwatlaw;
– máhállelerdi óz ara húrmet, awızbirshilik, ádillik hám tárbiya ornına aylandırıw;
– jer, suw, hawa hám tábiyiy ortalıqtı qorǵaw, muqaddes dárgaylar, ziyarat orınları hám qoyımshılıqlardı abadanlastırıw;
– Ramazan ayı menen baylanıslı ilajlardı ısırapgershilikke jol qoymastan, ıqsham, mazmunlı hám únemlilik tiykarında ótkeriw.

Ramazan ayın ótkeriw menen baylanıslı ilajlar ǵalaba xabar qurallarında keń sáwlelendiriledi.