Ájiniyaz atındaǵı Nókis mámleketlik pedagogikalıq institutında Ózbekstan Respublikası Ministrler Kabinetiniń rásmiy organı «Yangi Ózbekiston» hám «Pravda Vostoka» gazetaları kúnleri, sonday-aq, sońǵı on jıl ishindegi elimizdegi keń kólemli reformalardıń nátiyjeleri haqqında sóz etetuǵın «Yangi Ózbekiston orzusi» kitabın keń jámiyetshilikke tanıstırıw keshesi bolıp ótti.

Ilajǵa «Yangi Ózbekiston» hám «Pravda Vostoka» gazetaları redakciyası bas redaktorı Salim Doniyorov, bas redaktor orınbasarı Abu Bakir Urozov, Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, Qaraqalpaqstan Jazıwshılar awqamı baslıǵı Keńesbay Kárimov, elimizge belgili ziyalılar, dóretiwshiler, institut professor-oqıtıwshıları, student-jaslar hám ǵalaba xabar quralları wákilleri qatnastı.

Ilajdıń tiykarǵı maqseti jaslardı elimizde ámelge asırılıp atırǵan reformalardıń mazmunı menen jaqınnan tanıstırıw, olardıń jámiyetlik-siyasiy processlerge qatnasın arttırıw hám ǵalaba xabar qurallarına bolǵan qızıǵıwshılıǵın kúsheytiwden ibarat boldı.

Keshede sózge shıqqanlar elimizde sońǵı on jıl dawamında ámelge asırılǵan túpkilikli reformalar, olardıń basqıshları hám erisilgen nátiyjeler haqqında tolıq sóz etildi. Sonıń ishinde, ekonomikalıq tarmaqlardı modernizaciyalaw, investiciya ortalıǵın jaqsılaw, isbilermenlikti qollap-quwatlaw, xalıqtıń turmıs dárejesin arttırıw baǵdarındaǵı orınlanǵan keń kólemli jumıslar mısallar arqalı kórsetip berildi.

Ayrıqsha atap ótilgenindey, Qaraqalpaqstan Respublikasında da sociallıq-ekonomikalıq rawajlanıwdı támiyinlew, aymaqtıń infrastrukturasın jaqsılaw, jańa jumıs orınların jaratıw, xalıqtıń bántligin támiyinlew boyınsha áhmiyetli joybarlar turmısqa engizilmekte. Bilimlendiriw, densawlıqtı saqlaw, mádeniyat hám sport tarawlarında júz berip atırǵan jańalanıwlar aymaq xalqınıń abadanlıǵın arttırıwǵa xızmet etip atırǵanı kórsetip ótildi.

Sonday-aq, ilaj sheńberinde Ózbekstanda xızmet kórsetken jurnalist Salim Doniyorovtıń «Yangi Ózbekiston orzusi» kitabı keń jámiyetshilikke tanıstırılıp, dóretiwshiler, pedagoglar hám jaslar tárepinen kitaptıń mazmunı haqqında bayanatlar jasaldı.

Keshe dawamında gazetalarda járiyalanıp atırǵan analitikalıq maqalalar, intervyuler hám áhmiyetli temalardaǵı materiallar mısalında jurnalistikanıń jámiyetlik rawajlanıwdaǵı ornı keń dodalandı. Qatnasıwshılarǵa bul basılımlardıń jumısları, olardıń jámiyette ashıq-aydınlıqtı támiyinlewdegi roli haqqında tolıq maǵlıwmatlar berildi.

Jaslar qatnasıwında gazetalar turmısı hám elimizdegi reformalarǵa baylanıslı soraw-juwaplar ótkerilip, belsene qatnasqanlarǵa sawǵalar tapsırıldı.

Ilajda student-jaslar ózlerin qızıqtırǵan sorawlarǵa tolıq juwap aldı, reformalardıń nátiyjeliligi boyınsha óz pikir-usınısların bildirdi.

NMPI baspasóz xızmeti.